Əziz uşaqlar! Azərbaycan Dövlət Gənc Tamaşaçılar Teatrının iyun ayında sizin üçün nəzərdə tutulan repertuarını təqdim edirik.      

Mayın 27-də Azərbaycan İstiqlal Muzeyində 28 May – Respublika Gününə və 1 iyun – Uşaqları Beynəlxalq Müdafiə Gününə həsr olunmuş tədbir-sərgi keçirildi. 

Mayın 28-dən iyunun 1-dək 12 ölkənin gənc istedadları Klimoviçidə (Belarus) keçiriləcək “Zolotaya pçyolka” XIV Beynəlxalq uşaq yaradıcılığı festivalında iştirak edəcəklər. Bu festivala təqribən 30 nümayəndə heyəti – cəmi 700 nəfərdən çox iştirakçı gələcəkdir. İlk dəfə olaraq foruma Özbəkistandan və Türkmənistandan qonaqlar gələcəklər. Festivalda Azərbaycan, Qazaxıstan, Çin, Qırğızıstan, Latviya, Moldova, Rusiya, Ukrayna və Finlandiyadan olan nümayəndələrin iştirakı gözlənilir.      

Azərbaycan Dövlət Rəssamlıq Akademiyasının (ADRA) muzey-sərgi kompleksində ADRA-nın və Təhsil Nazirliyinin birgə təşəbbüsü ilə “Saf rənglər” II Beynəlxalq uşaq və yeniyetmələrin rəsm yaradıcılığı festivalının açılışı olub. Festivalda “Azərbaycan 2015-ci il ilk Avropa Oyunlarının ev sahibidir”, “Mənim ölkəmin suveniri” və digər nominasiyalarında müsabiqəyə uşaq və yeniyetmələrin təsviri sənətin bütün janrları üzrə yaratdıqları müxtəlif ölçülü əl işləri təqdim olunub.    

Azərbaycan Dövlət Gənc Tamaşaçılar Teatrında Bakı Uşaq Teatrının yeni tamaşasının premyerası olub. “Günahsız günahkarlar” adlanan tamaşa Gənclər və İdman Nazirliyinin sifarişi ilə hazırlanıb. Tamaşa müasir dövrün qlobal problemlərindən olan insan alverinin tanıdılmasına həsr edilib və maarifləndirici xarakter daşıyır.    

F.Köçərli adına Respublika Uşaq Kitabxanası Mədəniyyət və Turizm Nazirliyinin təşkilati dəstəyi ilə Bakı şəhər uşaq və gənclər yaradıcılıq mərkəzləri arasında “Dünyanın mədəniyyət rəngləri” adlı yarışma keçirəcək. Yarışma 22 may - Beynəlxalq Biomüxtəliflik Günü münasibətilə təşkil olunacaq. Yarışmada Bakı şəhərinin Nəsimi, Sabunçu, Yasamal, Səbail, Binəqədi, Xətai, Nərimanov, Qaradağ, Xəzər, Suraxanı, Pirallahı və Nizami rayonlarının uşaq və gənclər yaradıcılıq mərkəzləri iştirak edəcək.