Səkkiz yaşlı kürdəmirli şahmatçı həmyaşıdları arasında birinci olub

29.01.2014. Şəmkirdə 16 yaşadək oğlanlar və qızlar arasında şahmat üzrə Azərbaycan birinciliyinin seçmə yarışlarında 8 yaşlı Kürdəmir şahmatçısı Fərhad Məmmədov yüksək nəticə əldə edib. O, 9 oyundan 7 qələbə və 2 heç-heçə ilə 8 xal toplayaraq həmyaşıdları arasında birinci yeri tutub.

Balaca şahmatçı iyun ayında Bakıda keçiriləcək Azərbaycan birinciliyinin final oyunlarına vəsiqə qazanıb.

Fərhad Məmmədovun bu uğuru onun valideynləri və yaxınları, rayon idmançıları, Kürdəmir şəhərinin ictimaiyyəti tərəfindən sevinclə qarşılanıb. İsveçrə sistemi ilə keçirilən və 9 turdan ibarət yarışlarda respublikamızın 53 rayonundan 353 şahmatçı iştirak edib.

29.01.2014