Bakı, 12 iyun, AZƏRTAC

İyunun 12-də Təhsil Nazirliyinin 3 nömrəli Uşaq-Gənclər İnkişaf Mərkəzində Azərbaycan Xalq Cümhuriyyətinin 100 illik yubileyinə və Yer Gününə həsr edilmiş incəsənət müsabiqəsinin qaliblərinin mükafatlandırılması mərasimi keçirilib.

AZƏRTAC xəbər verir ki, müsabiqə ABŞ-ın Azərbaycandakı səfirliyi, “Rəsm” zərgərlik evi, Təhsil Nazirliyinin nəzdindəki uşaq-gənclər mərkəzləri tərəfindən birgə təşkil olunub.

Tədbirdə məlumat verilib ki, müsabiqə 6-16 yaşında olan gəncləri ətraf mühit məsələləri barədə maarifləndirmək və istedadlı uşaqları aşkara çıxarmaq məqsədilə keçirilib.

Beynəlxalq münsiflər heyəti müsabiqəyə təqdim olunan 500-dən çox əl işindən 60-nı seçib.

Sonra müsabiqənin qaliblərinə mükafatlar təqdim edilib.