Gerenuk - qeyri-adi antilopdur. O, dəvə kimi uzun müddət susuz yaşaya bilir. Gerenukun vətəni olan Somalidə onu ovlamır, ovlamaq niyyəti ilə saatlarla qovmur, izləmir, incitmirlər. Gerenuku yalnız gəlmə ovçular ovlayır.  Gerenuk həm də bəzi xüsusiyyətlərinə görə zürafəyə bənzəyir. Zürafədən sonra bəlkə də ikinci heyvandır ki, ən yüksəkdə olan yarpaq və yaşıl pöhrələri yeyə bilir. Çünki o, insan kimi iki ayaq üstündə dayanır, belə vəziyyətdə saatlarla qalıb qidalanır.   

Dünyanın ən hündür ağacı San-Fransiskoda yerləşən Redvud Milli Parkındakı iynəyarpaqlı sekvoya-Hiperion (Hyperion) ağacıdır. Onun hündürlüyü 115.5 metr, təxminən 38 mərtəbəli bina hündürlüyündə, diametri isə 4.63 metrdir.

Qədim inklər bizim eradan təxminən 500 il əvvəldən alpakanı əhliləşdiriblər. Məqsəd onun ətindən, südündən və yunundan istifadə etmək olub. Hətta alpakanın peyini də inklərin yurd yerlərini qızdırmaq məqsədilə istifadə edilib. Alpaka “inklərin qızılı” adını təsadüfən almayıb. Qədim hindlilər də alpakaları eyni məhəbbətlə seviblər. Alpaka yunu yunlar şahıdır, desəm, yəqin ki, etiraz edən olmaz. Qoyun yunundan yüngül, dəvə yunundan isti və rəngarəng... Alpaka yununun 24 rəng çaları var.   

Qəlbi qanlı Luson qumrusu (gallicolumba luzonica),  Gallicolumba cinsinin bir növüdür. “Qəlbi qanlı” adlanmalarının səbəbi ürəklərinin yerləşdiyi bölgədə qan-qırmızı rəngdə tüklərin olması və qan axırmış kimi görüntü yaratmasıdır. 

Çimərlik dedikdə ağlımıza sarı, ağ qumla örtülmüş dəniz sahili gəlir. Ancaq Panjin (Panjin Red Beach) çimərliyi digərlərindən fərqlidir.