Keşyu və ya Anakard (anacardium occidentale) saqqız ağacıkimilər fəsiləsinə mənsub həmişəyaşıl tropik iqlim bitkisidir. Keşyu meyvəsi və fıstığı adını elə bu ağacdan götürmüşdür. Vətəni Braziliyadır, ancaq XVI əsrin başlanğıcında portuqaliyalılar Braziliyanı zəbt etdikləri zaman bu ağacın varlığından xəbər tutmuş onun toxumlarını buradan Afrikanın qərb sahillərinə gətirərək, bu torpaqlarda əkib-becərmişdilər. 

Keşyu ağacının əlverişli inkişafı üçün yağışlı və nəmli ekvator iqlimi çox əlverişlidir. Elə bu səbəbə görə də anakard ağacı qərbi Afrika sahillərinə- Qabon, Anqola, Namibiya daha sonra Vyetnam, Nigeriya, Hindistan kimi ölkələrə, şərq ölkələrinə - Mozambik, Keniya və Tanzaniyaya və Fil Dişi sahillərinə də yayılmışdır.

Hal-hazırda dünyanın ən böyük anakard istehsalçısı və ixracatçısı Hindistanda Kerala Anakard Birliyidir.

Tikuna dilində keşyu sözünün tərcüməsi “Sarı meyvə” deməkdir. Bu meyvəyə Venesuelada “Merey”,  Braziliyada “Maranon” da deyirlər.

Keşyu alması əslində ağacın saplaqlarıdır. Armudşəkilli və ya rombabənzər uzunsovşəkilli saplaqlar 5-11 sm uzunluğunda ola bilir. Botaniklər bu saplağı psevdomeyvə “yalançı meyvə” adlandırırlar. Yalançı meyvənin sulu, büzücü, turşməzə dadı vardır. Lakin bitkinin əsl meyvəsi armudşəkilli psevdomeyvədən sonra gələn hissəsidir və ona keşyu “anakard” fıstığı deyilir. Bu fıstıq xaricdən boksçu əlcəyini xatırladır. Ona görə də bu bitkinin meyvəyə oxşayan saplağı deyil, fıstığı yeyilir. Bir meyvənin çəkisi 1,5 qramdır. Psevdomeyvənin istehsalı çox çətindir. Çünki sutka ərzində xarab olur.

Anakard fıstığı, digər fındıqlara nisbətən daha aşağı yağlılığına görə ürək sağlamlığı üçün olduqca faydalıdır. Xolesterola təsir etməz və antioksidan xüsusiyyətin olduğu üçün ürək sağlamlığını dəstəkləyir.