Qoyun sürüsü otaran kiçik çoban canavar görmüş kimi yalandan qışqırmağa başladı:

– Köməyə gəlin! Köməyə gəlin! Canavar var!

Çobanlar tez qaçıb köməyə gəldilər. Amma balaca oğlanın yalan söylədiyini gördülər.

Balaca çoban eyni şeyi bir neçə dəfə təkrarladı, “Canavar gəldi”, – deyə yalandan qışqırıb hər kəsi başına topladı.

Günlərin bir günü, doğrudan da, canavar gəldi. Oğlan yenə:

– Köməyə gəlin! Köməyə gəlin! Canavar var! – deyə qışqırdı.

Amma təəssüf ki, bu dəfə çobanlar onun yenə yalandan qışqırdığını düşünüb yanına getmədilər.

Canavar da ətrafında heç kimin olmadığını görüb sürüdəki bütün qoyunları bir-bir öldürdü.