Gerenuk - qeyri-adi antilopdur. O, dəvə kimi uzun müddət susuz yaşaya bilir. Gerenukun vətəni olan Somalidə onu ovlamır, ovlamaq niyyəti ilə saatlarla qovmur, izləmir, incitmirlər. Gerenuku yalnız gəlmə ovçular ovlayır.  Gerenuk həm də bəzi xüsusiyyətlərinə görə zürafəyə bənzəyir. Zürafədən sonra bəlkə də ikinci heyvandır ki, ən yüksəkdə olan yarpaq və yaşıl pöhrələri yeyə bilir. Çünki o, insan kimi iki ayaq üstündə dayanır, belə vəziyyətdə saatlarla qalıb qidalanır. 

Onu bəzən "zürafə ceyranı" da adlandırırlar. Gerenuk böyük boyun üzərində balaca başa sahibdir ki, bu da ona əlverişli qidalanma imkanı yaradır. Balaca başdakı yekə qulaqlar onu çox böyük təhlükələrdən qoruyur. O, yaxınlaşan təhlükəni tez duyur.

Dişi gerenuklar bir il müddətində yetkinliyə çatır, azad gəzib-dolaşırlar. Erkək generuklar isə buynuzlu başlarını analarının yanında gizlədə-gizlədə 2-3 il analarından  ayrılmaya bilərlər. Elə buna görə də onlar gec-gec dünyaya gəlir, təbiətin nadir heyvanına çevrilirlər. Generuklar cəmi 10-12 il yaşayırlar.