Çimərlik dedikdə ağlımıza sarı, ağ qumla örtülmüş dəniz sahili gəlir. Ancaq Panjin (Panjin Red Beach) çimərliyi digərlərindən fərqlidir. Onu digərlərindən fərqləndirən qumsuz sahili və qırmızı rəngidir. Rəngin səbəbi dayaz sahildə yaşayan “Chenopodiaceae” bitkilər aləmindən olan  Suaeda salsa yosunlarıdır. Landşaftı dayaz dəniz torpaqlarından ibarətdir.

Təbii yolla yaranmış bu qırmızı çimərlik, Çinin Panjin şəhərinin 30 kilometr cənub-qərbində, Dava bölgəsində, Liaohe çayı (Liaoning) deltasında yerləşir. Bura dünyanın ən böyük nəmli və qamışlı bataqlığıdır. Qırmızı sahilin 132 km-lik ərazisini əhatə edən “suaeda salsa” yosunları qələvili və duzlu torpaqlarda bitir. Aprel aylarında böyüməyə başlayır və avqust-sentyabr aylarında rəngini dəyişərək qırmızıya çevrilir.

Çimərlik 260 növ quşa (20 növ qorunur) və 399 növ vəhşi heyvana ev sahibliyi edir. Hətta nəsli tükənmək təhlükəsi altında olan “Taclı durna və Qara dimdikli qağayılar”  da burada yaşayır. Buna görə də bəzən bu ərazilər “Durnaların evi” kimi də adlandırılır. Ekosistemi qorumaq üçün çimərlik müəyyən əraziləri istisna olmaqla, səyahətə qapalıdır. Bura bir çox təşkilatlar tərəfindən qorunur və yalnız VİP turistlərin girişinə icazə verilir. 

1988-ci ildə dövlət-səviyyəli mühafizə sahəsinə yüksəldilib və Beynəlxalq insan və biosferi qoruma şəbəkəsinə qoşulması üçün müraciət edilib.