Habenaria radiata səhləbi (Habenariya səhləbi) - 15-30 santimetr hündürlüyü olan bitkidir. Bu bitki Yapon adalarında çox yayılıb. Qorunan bitkilər siyahısına daxildir. Onun digər və daha çox tanınan adı isə “Ağ vağ səhləbi”dir. Ağ vağ səhləbi böyük ağ çiçək açır. Çiçəkləri mirvari-ağ parıltılıdır, məxməri ləçəkləri var və Vağ quşunu xatırladır. Yaponiyada Ağ vağ səhləbi haqqında əsrarəngiz əfsanə dolaşır. 

Əfsanə belədir: Bu hadisə lap çoxdan baş verib... Uzun illər bundan əvvəl Yer kürəsinin lap kənarında, hər gün günəşin ilıq nəfəsi ilə yuxudan ayılan bir diyarda, daha doğrusu, bu diyarın adalarından birində. Bu adalardan ən gözəlində, mavi-çəhrayı kəpənəklər uçuşan çəmənlərin birində bapbalaca bir oğlan keçi otarırdı. Bu keçi adi keçilərdən deyildi. Bu keçi Mikado (Yapon hakimlərindən biri) keçisi idi... Keçi yamyaşıl otdan otlayır, oğlan isə kədərlə səmaya baxırdı. O çox kədərli idi. Çünki heç vaxt böyük döyüşçü – samuray ola bilməyəcəkdi. Və o düşünürdü ki, həyat çox acımasızdır. Niyə bəziləri dünyaya zəngin olaraq gəlir və samuray olmağı arzulamadan samuray ola bilir? Digərləri isə dərin ehtiyac içində doğulur, bütün ömrü boyu samuray olmağı xəyal edir, qənaətlə pul toplayır, çalışır, zəhmət çəkir, amma sonda samuray ola bilmir. “Bu nə yaradılışdır? Rütbələr insanların nəyinə gərəkdir? Niyə hamı bərabər deyil? Nədən ayrıseçkilik hökm sürür. Axı hamı eyni səma altında yaşayır, eyni suyu içir, eyni quşların uçuşunu seyr edir”. Elə bu vaxt kədərli düşüncələrdən ayrılıb iki dənə quşun uçduğunu görür. Bunlar ağ vağ quşları idi. Və onlar o qədər gözəl və əsrarəngiz idi ki, balaca oğlan kədərini unudur. Gözlərini səmadan çəkmədən baxır, baxır, baxır... Və gözlərini endirəndə çəməndə ağappaq çiçəklər görür. Səhləb çiçəkləri. Çiçəklər bayaqdan səmada uçan quşlara elə bənzəyirdi ki... Balaca çoban gülü qazıb çıxardır, evə gətirib dibçəkdə əkir. Düz evin qarşısına qoyur. Hər gün bu çiçəkləri seyr edir. Və Buddadan gələn danılmaz həqiqəti bir daha anlayır: “Bu dünyada hər şey gəlib keçəndir, bu ağ vağ quşlarının uçuşu kimi. Yalnız gözəllik əbədidir. Bu çiçəyə bax, həmişə yada sal!” O vaxtdan əsrlər ötüb. Yaponlar hələ də Ağ Vağ səhləbi yetişdirir. Və gözəlliyin əbədiyaşar olduğuna inanırlar. Amma çox təəssüf ki, bu çiçək məhvə doğru gedir. Getdikcə kökü kəsilir. Və yapon xalqı onun yaşaması üçün əlindən gələni edir. “Ağ vağ səhləbinin yaşaması gözəlliyin əbədi olmasına işarədir”, - deyə düşünürlər.