Su maralı (Hydropotes inermis) marallar (Cervidae) fəsiləsidən olub, müşk maralına bənzəyir. Hydropotes inermis yunan sözü olub, mənası “húdōr” su, “potes” içən yəni su içən deməkdir. Bu maralların yalnız erkəklərinin aşağıya doğru uzanmış iri dişləri vardır və buynuzları olmur. Buynuzları olmadığından, mübarizə apararkən yan-yana gələr, başlarını aşağıya doğru sallayaraq, dişləri ilə bir-birlərini yaralamağa çalışarlar. Sonunda bir erkək maral məğlub olduğunda başını aşağı salar və ərazini tərk edər. Hətta bəzən qalib olan məğlub olanı ərazini tərk edənə kimi təqib edər.

Bu növün adı isə latın dilindən “inermis,” yəni silahsız, müdafiəsiz olub, buynuzlarının olmadığını bildirir. Su maralı, marallar fəsiləsinin yeganə dişli növü deyil. Marallar fəsiləsinin digər növü Muntjaklarda  (lat. Muntiacus) da dişlər var. Ancaq Muntjakların su marallarından fərqli olaraq buynuzları da var. Bundan başqa, “Moschidae” fəsiləsindən müşk maralları da bu cür dişlərə sahibdir. İndiyə qədər su marallarının iki alt növü qeydə alınmışdır: Çin su maralı (Hydropotes inermis inermis)  və Koreya su maralı (Hydropotes inermis argyropus).

Bu canlılar davamlı olaraq İngiltərəyə daşınmışdır. İngilis dilli ərazilərdə onlara bəzən “vampire deer” yəni vampir maralları da deyirlər. Digər növlərdən fərqli olaraq, su maralları daha balacadır. Onların bədən uzunluğu 75-100 sm, çiyin hündürlüyü 45-55 sm, quyruq uzunluğu 6-7,5 sm və ağırlıqları isə 9-14 kq-dır. Su marallarının köpək dişləri uzanaraq 5,5-8 sm uzunluğunda olur. Dişlər, maral 6-7 aylıq olduqda çıxmağa başlayır.

Su maralları suda üzməyi yaxşı bacarır və bataqlıq yerlərdə də yaşaya bilirlər. Dişilər bir dəfəyə 4-5 bala doğa bilirlər. Bu, digər marallarla müqayisədə çox yüksəkdir.