Aysel kitab oxuyur,

Kitabdan doymur Aysel,

Kitabları əlindən

Heç yerə qoymur Aysel.

Aysel bilən şeirləri

Ana da əzbərləyir.

Aysel bir sözü çaşsa,

O sözü ana deyir.

Onun oyuncaqları

Şeirlərlə əylənir.

Aysel oxuyan şeiri

Evdə hamı öyrənir.

Hələ təkcə budurmu?

Həyətdəki uşaqlar,

Ayselgilə həmişə

Gələn əziz qonaqlar,

Aysel bilən şeirləri

Onlar da əzbər deyir.

Bir də görürsən hamı

Xorla şeir söyləyir.

Yazılıb doğma dildə,

Bu şeirlər şirindir.

Bəlkə bununçün belə

Aysel olub şirindil...

Tumarlayıb saçını,

Tərifləyib biz onu,

Soruşuruq Ayseldən

Gələcək arzusunu,

Fərəhlənir:

Böyüyüb

Müəllim olacam mən.

Sizə də öyrədirəm

Dərslərimi indidən!