Odlar yurdu – Azərbaycan

Azərbaycan şimalda Böyük Qafqaz silsiləsi, cənubda Kiçik Qafqaz və Talış dağlarının arasında yerləşdir. Ərazisinə görə Azərbaycan Cənubi Qafqazın ən böyük ölkəsidir (86,6 min km²). Ölkə ərazisinə Xəzər dənizində yerləşən adalar da daxildir (Bakı və Abşeron arxipelaqı).

Naxçıvan Muxtar Respublikası və onun 9 iqtisadi-coğrafi zonası da Azərbaycan Respublikasının tərkibinə daxildir.

Dağlıq Qarabağ və ətraf yeddi rayon daxil olmaqla, Azərbaycanın 20 faiz ərazisi hazırda Ermənistan silahlı qüvvələrinin işğalı altındadır.

Azərbaycanın paytaxtı Bakı şəhəridir. Ən iri şəhərləri Gəncə, Sumqayıt, Şəki, Mingəçevir, Lənkəran, Naxçıvan, Xankəndidir (hazırda Ermənistanın işğalı altındadır).

Ölkəmiz şimalda Rusiya Federasiyası, şimal-qərbdə Gürcüstan, cənubda İran, qərbdə Ermənistan və cənub-qərbdə Türkiyə ilə həmsərhəddir. Ölkənin şərq sahilləri Xəzərin suları ilə yuyulur.

Xəzərin orta və cənub akvatoriyası Azərbaycana məxsusdur.

Ölkənin ən hündür nöqtəsi Bazardüzü dağıdır (dəniz səthindən 4466 metr yüksəklikdə). Ən alçaq nöqtə isə Xəzəryanı ovalıqdır ( -28 m).

Azərbaycan subtropik zonaya aid edilir. Bu zonada mövcud olan 11 iqlim tipindən 9-u Azərbaycan ərazisində müşahidə edilir. Ölkə ərazisi təbii ehtiyatlarla zəngindir. Burada müxtəlif kimyəvi maddələrlə zəngin mineral su mənbələri vardır. Kəlbəcər rayonundakı (Ermənistanın işğalı altındadır) İstisu, Naxçıvandakı Badamlı və Sirab ölkədən kənarda da məşhurdur.

Dünyada mövcud olan 800 palçıq vulkanından 350-si Azərbaycan Respublikasında yerləşir.

Azərbaycanda təxminən 1250 xırda çay vardır. Onların hamısı Xəzər dənizinə tökülür. Bu çayların əksəriyyəti Qafqazın ən böyük çayı olan Kürün (1515 km), az hissəsi isə Arazın (1072 km) hövzəsinə daxildir. Burada 250 göl var. Lakin onların əksəriyyəti xırda göldür. Ən böyük göllər Hacıqabul (15.5 km²) və Böyükşor (10 km²) gölləridir. Murovdağ silsiləsinin şimal-şərqində möhtəşəm mənzərəli göllər mövcuddur. Onlardan biri də Qafqazın ən gözəl gölü olan Göy-göldür.

Azərbaycan inkişaf etmiş iqtisadiyyata malik və çeşidli məhsulların yetişdirildiyi sənaye-aqrar ölkəsidir. Azərbaycanın iqtisadiyyatında əsas yeri neft və neft məhsulları tutur.

Azərbaycan haqqında ümumi məlumat

Dövlət	Azərbaycan Respublikası
Paytaxt	Bakı
Ərazisi	86.6 min km²
Sərhədlərinin uzunluğu	3.600 km
Dəniz sərhədinin uzunluğu	800 km
Dəniz səviyyəsindən orta yüksəkliyi	384 metr
Ən hündür nöqtəsi	4.466 metr (Bazardüzü dağı)
Ən alçaq nöqtəsi	28 metr (Xəzəryanı ovalıq)
Yanvar ayının orta temperaturu	0-+4 С
İyul ayının orta temperaturu	+25-+28 С
Yığıntının orta miqdarı	1000 — 1800 millimetr
Əhalisi (2013-cü ilə əsasən)	9356.5 min nəfər
Şəhər əhalisi	4966.2 min nəfər
Kənd əhalisi	4390.3 min nəfər
Kişilərin sayı	x
Qadınların sayı	x
Əhali sıxlığı	x
Elektrik şəbəkəsi	220 Volt, 50 Hers
Saat qurşağı	AZV (UKV+4)
Dövlət dili	Azərbaycan dili
Pul vahidi	Manat

29.06.2013