Ana, mənə mahnı oxu,
Ana, getmə, yanımda qal.
Gözlərimə qonsun yuxu,
Ana, mənə bir layla çal.

Ana, mənə mahnı oxu,
Göydə ulduzlar da yatsın.
Ana, mənə bir layla çal,
Ay da yumurlanıb batsın.

Yuxulasın meşə, dəniz
Yuxulasın dünya səssiz.
Yuxulayaq hər ikimiz.
Ana, mənə mahnı oxu,
Gözlərimə qonsun yuxu.

Yuxularım çiçək-çiçək,
Qanadları zər kəpənək.
Əsib gəlsin sərin külək,
Ana, mənə bir layla çal.
Gözlərimə qonsun yuxu,
Ana, getmə, yanımda qal.
Ana, mənə mahnı oxu.