Ayam Cemani, İndoneziya mənşəli, naməlum və nisbətən müasir bir toyuq cinsidir. Onları digər toyuqlardan fərqləndirən isə rəngi, tükləri, dimdiyi, əti, sümüyü və hətta bütün iç orqanlarının qara rəngdə olmasıdır. 

Elmi tədqiqatlara görə onların belə qara olmasının səbəbi Asiyada ortaya çıxan və Avropaya yayılan genetik mutasiyadır. Mutasiyaya uğradıqlarına görə bu toyuqların orqanizmində olan melanin, normal toyuqlardan on qat daha çoxdur. Bu gen toyuqlarda "fibromelanos" adlanan hiperpiqmetasiyaya səbəb olur. Bunun nəticəsində toyuqlar qara rəngdə olur. Fibromelanos insan dərisində, saçında və beynin bəzi bölgələrində də olan tünd rəngli piqmentlər olan melaninləri çoxaldır. 

Bu cinsin mənşəyi İndoneziyanın Yava adasından gəlir. “Ayam” Indoneziya dilində toyuq, “Cemani” isə Yava adasında eyni adlı kəndin adıdır. Bu cins toyuqlar qara rəngdə olduqları üçün İndoneziyada əsrlərlə dini və mistik məqsədlər üçün istifadə edilib. 

İndoneziyada XV əsrdəki Majapahit Krallığı zamanından gələn inanca görə, Ayam Cemani toyuğu güc və bərəkət gətirir, olduğu yeri bəlalardan qoruyur.

Bu toyuqlar ilk dəfə hollandiyalı müstəmləkəçilər tərəfindən qeydə alınıb. 1998-ci ildə hollandiyalı Jan Steverik tərəfindən Avropaya idxal edilib. Hal-hazırda Niderland, Almaniya, Slovakiya və Çex Respublikasında da yetişdirilir. 

Bu cins bütövlükdə qara olmasına baxmayaraq, yumurtaları sarı-krem rəngdə, qanı isə qırmızıdır. Ancaq qanları yenə də adi toyuqların qanları ilə müqayisədə tünddür. Xoruzlar 2–2.5 kq, toyuqlar isə 1.5–2 kq-dır. Yumurtaları 45 qramdır. Toyuqları nadir hallarda cücə çıxarır.