Zirehlilər və ya armadillər (lat. Cingulata) – kəmdişlilər dəstəsinə aid heyvan dəstəsidir. Cənubi Amerikada yaşayan və «armadil» adlanan bu canlılar bütün bədənlərini örtən zirehləri ilə çox maraqlı bir görünüşə malikdir. Bu heyvanın əsas xüsusiyyətlərindən biri təhlükə zamanı müdafiə olunarkən dərisi ilə özünə qalxan düzəldib, top şəklini almasıdır. 

Bədəninin uzunluğu (quyruqsuz) 1 metrədəkdir. İri caynaqlıdır. Cənubi və Mərkəzi Amerikanın çöl, səhra, savannalarında və meşə kənarlarında yaşayır. Ən çox doqquzqurşaqlı zirehlilər, nəhəng zirehlilər və üçqurşaqlı zirehlilərə təsadüf olunur. Tək yaşayır, gecə həyatı keçirir, gündüzlər yuvada gizlənir. Xırda onurğalılar, cücülər, sürfələr və molyusklarla qidalanır. Böcəklərlə qidalanan bu canlılar qidalarını əsasən torpağı qazaraq axtarırlar. Armadillər çox yüksək qoxubilmə hissiyyatına malikdir. Qidanın qoxusunu dərhal hiss edən armadil burnunu torpağa dayayaraq onu elə həyəcanla qazır ki, sanki iyi itirməkdən qorxur. Armadilləri bu vəziyyətdə görənlər heyvanın necə nəfəs aldığına təəccüb edə bilər. Halbuki armadillər bu vəziyyətdə nəfəs almırlar. Çünki onlar altı dəqiqəyə yaxın nəfəslərini saxlama qabiliyyətinə malikdir. Bu isə torpağı qazdıqları zaman boğulmalarının qarşısını alır. Torpağı qazarkən çox sürətli davranar və bu müddət içində burunları torpaq ilə təmas halında olduğundan nəfəslərini tutarlar. Armadildə yumurtalıqlarda yalnız bir dənə yumurta meydana gəlməsinə baxmayaraq artma hadisələri nəticəsində 4-12 bala dünyaya gətirir. Təxminən 20 növ armadil mövcuddur.