Fransanın Haust-de Seine (O-de-Sen) bölgəsində, Sena çayı üzərində yerləşən La Qrand-Jatt adası  Neuilly-sur-Seine (Neym-Syür-Sen) və Levallois (Levallua-Perre) kommunaları ilə əhatə olunub. Notr-Dam kilsəsindən 7 km uzaqlıqda, demək olar ki, Parisin girəcəyində yerləşən La Qrand-Jatt adasını Şarl de Qoll meydanından da cəmi 3 km ayırır. Adanın uzunluğu 2 km, ən geniş hissəsi isə 200 m-dir. Əhalisinin sayı 4.000 nəfər təşkil edir. La Qrand-Jatt adı “Cam adası” və ya, “Böyük Cam adası” mənalarını verir.

Bu ada həm rəssam Jorj-Pyer Syoranın puantilizm üslubunda çəkdiyi  “La Qrand-Jatt adasında bazar günü” (1884-6 və 1889) adlı əsəri, həm də Stiven Soundheymin  “Bazar günü Corc ilə parkda” myuziklı ilə məşhurdur. Rəsm əsəri hazırda Çikaqodakı İncəsənət İnstitutunda sərgilənir.

        
1818-ci ildə Orlean hersoqu Lui-Filipp Şato-de-Nöyi qəsrini on uşaqlı ailəsi üçün almışdı. O, torpaq alaraq adanın da daxil olduğu böyük park saldırmışdı. Həmin parka yalnız qayıq vasitəsilə getmək mümkün idi. Hersoq həmçinin, atasının tikdirdiyi Mars məbədinin yerini dəyişdirərək Park Monsodan adanın şimal hissəsinə yerləşdirmişdi və onu Sevgi məbədinə çevirmişdi.

1930-cu ildə isə məbəd adanın cənub hissəsinə köçürüldü.

1850-1870-ci illər arasında III Napoleon və baron Hausmann adanı yenidən bərpa etdikdən sonra rəssamlar yenə də burda işləməyə başladılar. XIX əsrin sonunda  ada öz rəssamları, xüsusilə, impressionistləri ilə tanınırdı. Jorj-Pyer Syoradan başqa, Klod Mone, Vinsent van Qoq, Alfred Sisley, Çarlz Anqrand və Albert Qliiz kimi məşhur rəssamlar da burada işləyib və adanın ecazkar mənzərələrini yaradıblar.

2009-cu ilin iyununda ada ətrafında gəzinti təşkil olunub və burada impressionist rəssamların əsərləri sərgilənib.

Qrand-Jatt adası Parisin ən dəbdəbəli məkanlarından biridir. Belə ki, adada Fransanın bir çox tanınmış şəxslərinin evləri olub. Nikola Sarkozi keçmiş həyat yoldaşı ilə burada yaşayıb, həmçinin ölkənin məşhur müğənnilərinin, aktyorlarının, jurnalistlərinin də əksəriyyəti məhz La Qrand-Jatt adasında yaşayıblar.