Bolqarıstanda 100 turistik bölgə var. Bunlardan biri də Prohodna mağarasıdır. Prohodna ölkənin paytaxtı Sofiyadan 112 km uzaqlıqda, Loveç vilayətindəki Lukovit şəhərinin Karlukova kəndində yerləşir. Mağaranın məşhur olmasının səbəbi tavanında yerləşən iki badamşəkilli gözəbənzər oyuqlardır. Müəyyən istiqamətdən baxıldıqda üzdəki gözlərə bənzəyir. Buna görə də bolqar yerli xalqı mağaranı Tanrının gözləri (God’s Eyes) adlandırır. Oyuqlara Oknata (The windows), yəni pəncərələr adı verilib. Mağara 262 m uzunluğundadır.

Mağaranın bir-biri ilə üzbəüz iki girişi var: Böyük giriş və Kiçik giriş. Böyük giriş 42.5-45 m, kiçik girişi isə 35 m-dir. Mağaraya kiçik girişdən girib, böyük girişdən çıxılır. Bura həmçinin Mağara keçidi adı ilə də tanınır (Thoroughfare Cave or Passage Cave). 

Tanrının gözləri Bolqarıstanın ən böyük Mağara Kəməri olaraq da bilinir. Bu xüsusiyyətlərinə görə, Prohodna həmçinin, Avropanın ən yüksək girişə sahib olan mağarasıdır. 

Prohodna mağarasında yaşayan insanların Neolit və Kalkolit dövründə mağarada yaşadığını sübut edən prehistorik yaşayış yerlərinin izləri vardır. Mağara ölkədə təbiət turizminin ən yaxşısıdır. Böyük girişin ölçüsü turistlərə burada bungee jumpingle (ayaqdan ip bağlamaqla yuxarıdan aşağıya tullanma) məşğul olmağa imkan verir. 

Mütəxəssislərə görə eroziya yolu ilə yaranan oyuqlar mağaraya işığın düşməsinə səbəb olur. 

Ora səyahət üçün ən gözəl vaxt, gecə göy üzünün aydın və bütöv ayın səmada mövcud olduğu zamandır. Beləliklə mağaranın hər iki gözündən baxdıqda ay görünəcəkdir. Yağış yağdıqda su mağaranın gözlərindən girərək divarları isladır. Yerlilər bu zaman, Tanrının gözlərinin ağladığını deyirlər. Prohodna mağarasının gözləri hipnoz təsirinə malikdir. Buradan səmaya baxmaq insanı çox rahatladır. Bir çox yerli və xarici filmlər bu mağarada çəkilib.