Çin Qreypfurtu, ağac yemişi ya da şadok olaraq tanınan Pomelo meyvəsi qalın və bərk qabıqlı meyvədir. Həmişəyaşıl sitrus ağacının meyvəsi olan Pomelo olduqca faydalıdır. Diametri 15-30 sm-dir. Bu meyvənin çəkisi təxminən 2 kiloqramdır və 10 kq-a qədər böyüyə bilir. İri dilimləri və qabığı sarı rəngdədir. Günəş şüalarının daha çox dəydiyi nahiyələri isə açıq-çəhrayı rəngdə olur. 

Meyvənin dadı və tərkibi qreypfurta daha çox oxşayır. 

Pomelonun vətəni Malaziya, Asiya ölkələri, Fici adaları və Tonqo sayılır. Çinlilər yeni il ərəfəsində bir-birilərinə bu meyvədən hədiyyə edirlər. 

Pomelonun yığılması üçün ən yaxşı vaxt fevral ayı hesab edilir. 

Pomelonun tərkibində vitaminlər (A, C, B1, B2, B5), minerallar, liflər, efir yağları və təbii turşular var. Pomelo maddələr mübadiləsini sürətləndirir,piylənməni azaldır və piy əmələ gəlməsinin qarşısını alır, çəkinin azalmasına səbəb olur. 

Bu meyvəni yemək yaz-payız aylarında orqanizmi virus xəstəliklərinə yoluxmaqdan qoruyur. Ondan təzyiqi aşağı salmaq üçün də istifadə etmək mümkündür. 

Pomelonun daxili orqanlarla yanaşı dəriyə də faydası çox böyükdür. 

Faydaları ilə yanaşı mənfi tərəfləri də vardır. Belə ki, Pomelo meyvəsindən allergiyası olan adamların yeməsi məsləhət görülmür. Bu onlarda səpgilərin meydana çıxmasına, səslərində xırıltıların əmələ gəlməsinə səbəb ola bilir. Hepatit, qastrit və nefritdən də əziyyət çəkənlərə pomelo meyvəsi yemək tövsiyə edilmir.