Yatmaq istədi

Bir gün işıqfor.

Dedi: - Yatmasam,

Olacağam kor.

Gözlərin yumub

Xoruldadı o.

Nə işıq saçdı,

Parıldadı o.

Yuxusu yaman

Şipşirin idi.

Külək əsirdi

Çox sərin idi.

Qəfildən yuxu

Gördü işıqfor.

Gördü ki, dolub

Maşınlarla yol.

Maşınlar ona

Deyirlər laylay.

Göydən onlara

Yol göstərir ay.

Gah yaşıl olur,

Gah da qırmızı.

Maşınlar aydan

Qalıblar razı.

Şütüyüb ötür

Onlar həvəslə.

Nəğmə deyirlər

Çox hündür səslə:

-Yat, işıqfor, yat

Gözəldir həyat.

Açıqdır yollar

Səmada ay var.

Aydan bizlərə

İşıqlı pay var.

Səksənib durdu

Bu an işıqfor.

Gördü ki, dolub

Maşınlarla yol.

Yandı gözləri

Yaşıl, qırmızı.

Maşınlar ondan

Qaldılar razı.