Hüseyn Arif. Azərbaycan
Dosta möhkəm sədaqətli,
Qoynu bahar təravətli,
Beynəlmiləl təbiətli,
Bir diyardır Azərbaycan.
Bir nəğmədi, bir şeirdi,
Dinəndə Vurğun deyirdi,
Füzulidi, Üzeyirdi,
Şəhriyardı Azərbaycan.
Qəlbi dağlar baş-başadır.
O, Şəkidir, bu, Şuşadır,
Doğrudan da, tamaşadır
Başdan-başa Azərbaycan.
Baxdım ana torpağıma,
Aranıma, yaylağıma,
Min səs gəldi qulağıma
- Yaşa,
Yaşa, Azərbaycan!
