Tofiq Mütəllibov. "Anam işdən gələcək"
Bəzəmişəm otağı,
Hər yan gözəl, tərtəmiz
Stol üstə salınıb
Yaraşıqlı süfrəmiz.
Ağ güldanın içinə
Çiçək düzüm rəngbərəng,
Anam işdən gələcək.
Anam yorulmuş indi,
İşləyibdir səhərdən.
Qoy dincini alsın o,
Böyük qızam axı mən.
Hazır görcək süfrəni
Sevinəcək, güləcək
Anam işdən gələcək.
Yollar işıqlı olsun,
Günəş, hələ batma sən!
Yorulsan da mənimtək,
Bir az gözlə, yatma sən.
Sən də, ey qəşəng saat,
Bir azca tələs görək,
Anam işdən gələcək!
22.04.2020
