Bakı Yeni il ərəfəsində tamam başqa cür görünür: şəhər parlaq işıqlara bürünüb, küçələrdə bayram musiqisi və insanların sevincli səsi eşidilir. Mərkəzdə qurulan bəzəkli yolkalar, vitrinlərdəki rəngarəng dekorlar və axşamlar yanıb-sönən işıqlar şəhərə nağıl ab-havası qatıb.

Soyuq qış havasına baxmayaraq, küçələrdə hər kəsin Yeni il sevinci hiss olunur. “Soyuq əllər, isti ürək” deyimi burada tam mənası ilə öz əksini tapır: hər kəs bir-birinə sevgi və xoş ovqat paylaşır, əllər üşüsə də, ürəklər isti qalır.

Qurulan bəzəkli yolkalar Bakının tarixi simasını müasir bayram ruhu ilə birləşdirir. Küçələrdə Yeni il musiqiləri səslənir, isti içkilərin və təzə bişmiş şirniyyatların qoxusu havaya yayılır. İnsanlar ailələri və dostları ilə gəzintiyə çıxır, şəkillər çəkdirir, ilin son günlərinin həyəcanını və ümidini bölüşürlər.

Parlaq işıqların altında gəzən uşaqların sevinc dolu baxışlarında Yeni ilin ən saf sehri əks olunur. Rəngbərəng lampalar onların gözlərində ulduz kimi parlayır, hər bəzək, hər işıq fiquru onlar üçün yeni bir kəşfə çevrilir. Gülüşləri küçələrə yayılır, əllərini valideynlərinin əlindən buraxmadan yolkaya tərəf qaçmaq istəyi, Şaxta babanı görmək həyəcanı hiss olunur.

Yeni il ab-havasına xüsusi rəng qatan məkanlardan biri də Dənizkənarı Bulvarda təşkil olunan bayram yarmarkasıdır. Yarmarkanın ən diqqətçəkən yeniliklərindən biri isə şəhərin ilk açıq havada buz meydançasıdır. Bu məkan həm yerli sakinlərin, həm də turistlərin qış günlərini daha maraqlı və yaddaqalan keçirməsinə şərait yaradır.