Bu günlərdə Bakı şəhər Mədəniyyət Baş İdarəsinin Əhməd Bakıxanov adına 6 nömrəli musiqi məktəbində müxtəlif yaşlarda olan solistlərin çıxış etdiyi hesabat konserti keçirilib. AZƏRTAC xəbər verir ki, bu tədbir əsl musiqi və yaradıcılıq bayramına çevrilib.

Kütləvi ifa xüsusilə gənc musiqiçilər üçün həmişə həyəcanlıdır. Azərbaycan və xarici ölkə bəstəkarlarının əsərlərinin yer aldığı repertuar uşaqların ifasında möhtəşəm səslənib. Konsertin tamaşaçıları isə məktəblilərin hər bir çıxışını gurultulu alqışlarla müşayiət edən valideynlər olublar. İştirakçılar üçün bu konsert parlaq və unudulmaz hadisəyə çevrilib. Valideynlər səhnədə parlayan övladlarına qürurla baxırdılar, gərgin əməyinə görə onların müəllimlərinə təşəkkür edirdilər.

İfaçılar arasında gənc istedadlar Mədinə Yunuszadə və Əhməd Əziz də olub. Onların böyük ruh yüksəkliyi və əsl məharətlə ifa etdiyi musiqi nömrələri şagirdlərin yüksək səviyyədə hazırlığından xəbər verirdi. AZƏRTAC -ın müxbiri ilə söhbətində Mədinə musiqiyə necə gəldiyindən danışıb.

Musiqiyə sevgi populyar melodiyanın onun taleyini həmişəlik olaraq dəyişdirdiyi anda yaranıb. O vaxtdan bəri müxtəlif müsabiqələrdə həvəslə iştirak edərək vokal öyrənməyə başlayıb. Azərbaycan Gənclər Birliyinin təşkilatçılığı ilə keçirilən “Arts Olimpia 2024” müsabiqəsində gənc vokalçı 1-ci dərəcəli laureat olub. Mədinə, həmçinin “Astana Stars” beynəlxalq festival hərəkatı çərçivəsində gənc istedadların “Azerbaijan Grand Festival” beynəlxalq müsabiqəsində 2-ci dərəcəli laureat adına layiq görülüb.

Mədinə bu il musiqi məktəbini vokal ixtisası üzrə bitirir. Musiqi məktəbində gitara ixtisasına daxil olmaq üçün ərizə verib. Onun sevimli bəstəkarları arasında Qərbi Avropa musiqisinin klassiki Motsart, görkəmli Azərbaycan bəstəkarları Asəf Zeynallı və Qara Qarayev var.

Onun pedaqoqu Ülviyyə Hacıyevanın sözlərinə görə, Mədinə çox bacarıqlı qızdır. “Mədinə məndən əvvəl bir neçə müəllimdən dərs alırdı. Əvvəlcə çətin idi. Sonra onun ifaçılıq potensialı açılmağa başladı. Mədinənin valideynlərinə qızlarının konsertdə çıxış edəcəyini deyəndə, onlar təəccübləndilər. Bir müddətdən sonra onun səsi tam gücü ilə çıxmağa başladı. Çox zəhmətkeşdir, saatlarla oxuyur”, - deyə Ülviyyə xanım vurğulayır.

AZƏRTAC -ın digər həmsöhbəti - Əhməd Əziz dörd yaşından musiqi təhsili alır. Onun pərəstiş etdiyi müğənni əfsanəvi Rəşid Behbudovdur. Əhməd artıq “Arşın mal alan” operettasından Əsgərin ariyasını ifa edib. Klassik musiqi dinləməyi sevir. Vokalla paralel olaraq, Əhməd fortepiano dərslərinə gedir. O, Azərbaycan Gənclər Birliyinin Azərbaycan Rəqs Assosiasiyası ilə birgə təşkil etdiyi “Ümid 2024” incəsənət müsabiqəsində uğurla çıxış edərək 1-ci dərəcəli laureat olub, həmçinin respublika musiqi müsabiqələrində də yüksək yerlər tutub.

Ülviyyə Hacıyeva qeyd edir ki, Əhməd məqsədyönlü, kurikuluma ciddi əməl edən oğlandır. O, məşq etməyi sevir və əla nəticələr nümayiş etdirir. “Əhməd birinci sinifdən mənim şagirdimdir. Artıq üç ildir ki, mənimlə ifaçılıq sənətinin sirlərini öyrənir, qarşıda bizi daha iki məhsuldar il gözləyir. Onun səsi uşaq yaşlarına xas olan xoş tembrə malikdir, lakin indidən gələcək geniş diapazonunu hiss etmək olur. Əminəm ki, Əhmədi böyük gələcək gözləyir və o, bütün məqsədlərinə çatacaq”, - deyə Ülviyyə Hacıyeva bildirir.