Məşhur çaydır Girdmançay,

Yaman çaydır, yaman çay...

Yarğanı, dərəsi var,

Hay-küyü, nərəsi var.

Gözə görünməsə də,

Dağ yıxan qüvvəsi var.

A Girdmançay, Girdmançay,

Qınağındır duman, çay...

Sənin oylağın geniş,

Sənin yatağın geniş...

Sinən daşlarla dolu,

Dağ yolusan, dağ yolu.

Sıldırımlı qayanı

Yerindən oynadan çay...

Sənin kimi çay hanı,

A Girdmançay, Girdmançay!

Elə ki cürətlənib,

Elə ki qüvvətlənib

Sən yürüşə çıxırsan,

Dağ-qayanı yıxırsan.

Bir haray qoparırsan,

Qayalar aparırsan.

Qədim çaysan, çox qədim,

Tarixdir-hər qədəmin.

Ötüb keçir zaman, çay...

A Girdmançay, Girdmançay!