Kim teatrda olubsa, zalın işıqları sönərkən onu bürüyən hissi, yəqin ki, xatırlayır. Qaranlıq zalda işıq şüası ilə müşayiət olunan səhnə sirli, möcüzəli pərdəsi açılır və tamaşanın qəhrəmanları peyda olurlar. Səhnədə tamamilə yeni, qeyri-adi “həyat” başlayır. Orada baş verənlər həm doğru, həm də uydurmadır. Ona görə ki, teatr fantaziya, oyun aləmidir, möcüzəli teatr dünyasıdır.

Tamaşa qəhrəmanlarının geyimi, onları əhatə edən səhnə elementləri dekorasiyalardır. Onların bu qədər canlı görünməsində rəssamın da əməyi var. O, dekorasiyaları fikirləşir, aktyorun geyinəcəyi kostyumun eskizini çəkir. Dekorasiyanı böyük ölçüdə hazırlamaq üçün, əvvəlcə onun kiçik ölçüdə ilk görüntülərini çəkir, yapışdırır, yapır. Yəni teatrın kiçikölçülü maketini hazırlayır.

Möcüzələr ölkəsində uşaqlar da yaddan çıxmayıb. Kukla teatrı adlanan bu ölkənin aktyorları kuklalardır. Onlar da gəzməyi, danışmağı, gülməyi və ağlamağı bacarırlar.

Səhnədə kukla iplərin, çubuqların və ya əllərin köməyi ilə hərəkət edir. İplərin köməyi ilə canlanan kukla marionetka, ələ geyilən kuklalar isə əlcək kukla adlanır.

Kukla yaratmaq üçün rəssam onun üzərində uzun müddət işləyir. Əvvəlcə, yaradılacaq kuklanın kağız üzərində rəsmi çəkilir: hərəkət tərzi, xarakteri, necə danışacağı təsəvvür edilir. Sonra isə o, parçadan və ya taxtadan hazırlanaraq bəzədilir.

Bu peşə çox sirlidir... Kukla rəssamı ən sadə materialları — kağızı, əsgini, düyməni, lələyi məharətlə təmtəraqlı geyimə çevirə bilir.