Hər kəsin davranışı onun düşüncəsindən asılıdır.

Eyni bir hadisə haqqında iki insan fərqli düşünə bilər. Qəlbimiz aynaya bənzəyir: əgər o təmizdirsə, ətrafımızı da özündə təmiz, aydın əks etdirir və biz gözəl düşünürük. Yox, əgər qəlb aynamız ləkəlidirsə, o zaman biz də gördüklərimiz haqqında yaxşı düşünməyi bacarmayacağıq.

Hər kəs qəlbinin təmizliyinin qayğısına qalmalıdır ki, düşüncələri də təmiz və gözəl olsun.

Görürsünüzmü, sevgi, hörmət hissi hər kəsdə var, ancaq hamı bu hisləri düzgün idarə etməyi bacarmır. Buna görə də biz, ilk növbədə, öz düşüncələrimizdən başlamalı, həmişə müsbət düşünməliyik.

İnsanlar bir şəxs, bir əşya və ya bir hadisə haqqında həm müsbət, həm də mənfi düşünə bilərlər. Mənəvi qaynaqlarımız da insanların həmişə, hər zaman gözəl düşünmələrini tövsiyə edir.

“Mən inanıram ki, bu onun əməlidir” kimi qəti ifadə insana hörmət yox, alçalma və peşmançılıq gətirər.

Siz də bilmədiyiniz, gözünüzlə görmədiyiniz bir hadisə haqqında qəti qərar verməyin. Hər şeyə şübhə ilə yanaşmayın.

İnsan özünün mənfi cəhətləri ilə həmişə mübarizə aparmalıdır. Əgər insan özünün səhv hərəkətlərini, xarakterindəki mənfi cəhətləri başa düşmürsə, onları təhlil etmirsə, o, özünü tərbiyə edə bilməz, gələcək inkişafını təmin etməz.